Qlobal Şəbəkədə 152 milyard bloq mövcuddur “Pingdom” tədqiqat qrupu “İnternet 2010 rəqəmlərdə” adlı hesabatını açıqlayıb. Lent.az-ın Rabitə və İnformasiya Texnologiyaları Nazirliyinin rəsmi saytına istinadən verdiyi məlumata görə, 2010-cu ilin iyun ayında dünyada internet istifadəçilərinin sayı 1,97 milyard nəfər olub. Asiyada 825,1 milyon, Avropada 465,1 milyon, Şimali Amerikada 266,2 milyon, Latın Amerikası və Karib Hövzəsində 204,7 milyon, Afrikada 110,9 milyon, Yaxın Şərq ölkələrində 63,2 milyon və Avstraliya və Okeaniyada 21,3 milyon internet istifadəçisi var. Hesabatda qeyd olunur ki, cəmi Qlobal Şəbəkədə 255 milyon sayt fəaliyyət göstərir. Bu, 2009-cu ilə nisbətən 21,4 milyon sayt artıqdır. “Pingdom” ekspertləri elektron məktublaşmanı da hesablayıb. Ötən ildə dünya üzrə 107 trilyona yaxın elektron məktub göndərilib və bunların böyük hissəsini spam məktubları təşkil edir. 2010-cu ildə orta hesabla gün ərzində 293 milyard elektron məktub göndərilib və bu göstəricinin 89 faizi arzuolunmaz reklam göndərişlərinin payına düşür. Ümumiyyətlə, Qlobal Şəbəkədə 2,9 milyard elektron poçt akkauntu (qeydiyyat yazısı) və 152 milyard bloq mövcuddur.
|